బ్లాస్యం

ఉప్మా పురాణం
ఉప్మానా! నేను చస్తే తినను అని అనే వాళ్ళ ముందర ఒక పళ్ళెం నిండా ఉప్మా పెట్టి ఈ టపా చదివిస్తే ఇంకో పళ్ళెం కావాలని అడుగుతారు అంతగా మైమరపిస్తుందీ టపా. ఉప్మాకు టాటా చెప్పినవాళ్ళును లొట్టలేసుకొని చదివించే టపా. అప్పుడేమి జరిగిందంటే అని మొదలుపెట్టి చదివిన వాళ్ళ పొట్టలకు ఇప్పుడేమి జరుగుతుందో అని అనిపింపచేస్తారు క్రాంతి గారు.

బ్లాగు సింహా రెడ్డి
కొన్ని సింహాలుంటాయి. అవి రాయలసీమలో కూడా వుంటాయి. అవి అప్పుడప్పుడూ బ్లాగులో కొస్తాయ్. అలా వచ్చినప్పుడే పౌరుషాన్నంతా బయటికి వెళ్ళగక్కుతాయ్. ఆ సింహాన్ని కదిలించినప్పుడు మాట్లాడిందే ఈ టపా. జంబలకిడి పంబ నుండి వచ్చిందీ టపా.

నమ్మ బెంగళూరు
“రిమ్‌ జిమ్‌ రిమ్‌ జిమ్‌ హైదరబాద్..రిక్షావాలా జిందాబాద్..” అని హైదరాబాద్ లో ఆనందంగా తిరిగిన త్రివిక్రమ్‌ గారు బెంగళూరి నగర దల్లి “రవి వర్మదా చిక్కదా ఒందే ఒందు…” అని ‘హా’టలు ‘హా’డుకుంటూ, భాష బాధలు ఓర్చుకుంటూ తియ్యగా రాసిన టపా. త్రివిక్రమ్‌ తన అనుభవాన్నంతా రంగరించి రాయబోయే ‘హ’ది రోజుల్లో కన్నడ నేర్చుకోడమెలా? అనే పుస్తకం కాపీలు కావలంటే నేడే రిజర్వు చేసుకోండి. రేపుంటాయో లేదో తెలీదు.

మస్కిటో మక్కా
కుక్క కరిస్తే డాక్టర్ దగ్గరికెళ్ళి బొడ్డు చుట్టూ పాతికో పరకో ఇంజెక్షన్‌లు వేయించుకోవచ్చు. కానీ దోమే వంద ఇంజెక్షన్‌లు వేస్తే ఏమవుతుంది? అవి కూడా ‘ఒంగోలు గిత్త’ లా ఫేమస్ అయిన ‘తాడేపల్లి గూడెం’ దోమ కుడితే ఏమవుతుంది. ఇంకేమవుతుంది ఒక టపా తయారవుతుంది. దోమ బాధలు భరించి మీకు సంతోషాన్నిస్తూ సంతోష్ సూరంపూడి ‘నేను మీ పక్కింటబ్బాయ్’ అని చెబుతున్న కథనం.

మీర్రాసిన టపా హిట్టా ఫట్టా – విశ్లేషణాత్మక వ్యాసం
మీరు రాసిన టపా హిట్టా పట్టా అంటూ ఎక్కడా విహరించకుండా బ్లాగుల్లో విహరిస్తున్న విహారి రాసిన టపా.మీరు బ్లాగులు రాస్తుంటే వాటి భవిష్యేత్తేమిటో తెలియాలి కదా. అలా మీరు రాసే టపా హిట్టో ఫట్టో తెలుసుకోవాలనుందా? అయితే ఓ లుక్కేసుకోండి.

క్రేజీ కాంబినేషన్స్
బ్రాందీ, విస్కీ, ఓడ్కా లతో పాటూ కొన్ని పళ్ళ రసాలు కలిపితే అది కాక్ టైల్. అదే ఇడ్లీ తో ఆమ్లెట్, గోంగూరతో కొబ్బరి కాయ, టీ లో జిలేబీ, చేపల పులుసుతో బూందీ లడ్డూ లాంటి క్రేజీ కాంబినేషన్‌లు విన్నారా? వీటినే మంటారో తెలుసా? దీని గురించి తెలుసుకోవాలంటే బ్లాగుల్లో మహిళలకు ప్రమదా వనం అంటూ కాగాడా పట్టుకుని దారి చూపిస్తున్న జ్యోతి గారు బ్లాగునో సారి చూడండి.

పుచ్చకాయ పచ్చడి చేద్దాం రా..!!!.( సినిమా..)
బావా బావా పన్నీరు ..బావను పట్టుకు తన్నేరు అనే వాళ్ళు బ్లాగులు లేనప్పుడు. బ్లాగులొచ్చిన తరువాత బావను పట్టుకుని ఎలా ఏడిపించచ్చో తెలుసుకోవాలంటే ఓరుగల్లు మీనాక్షి గారిని అడిగి తెలుకోండి. ఎవరి కైనా కోపమొస్తే పుచ్చ లేచి పోద్ది రేయ్ అంటారు. ఈ పుచ్చకాయ పచ్చడి టపా చదివితే ఇల్లంతా రచ్చ రచ్చ చేస్తారు.

అమ్మాయిలు - ఆంటీలు
“యవ్వనం గువ్వ లాంటిది ఎగరనీ పైకెగరనీ…” అని ఎంత పైకైనా ఎళ్ళి పాడుకోవచ్చు గానీ వయసు పైకెళ్ళకూడదు. పిడుగు పాటు నైనా భరించవచ్చేమో కానీ ఈ అంటీ పిలుపు పోటుని భరించలేకున్నామని బ్లాగు లోని సుకుమార రమణులందరూ ముక్త కంఠంతో ఒప్పుకుంటూ నీరాజనాలర్పించిన టపా. మనసులోని మాట అంటూ తన అనుభవాల దొంతరలను అక్షరీకరించి బ్లాగులోకం లో ప్రవాహం లా సాగిపోతున్న సుజాత గారు రాసిన టపా ఇది. మిస్సయితే మీరు బామ్మో తాతో అయినట్లే.

ఆకాశ వీధిలో ‘ ఆకుపచ్చ కన్నీరు ‘
భామి మీదుంటే బాధలుంటాయి. భూమి లోకి పోతే బాధలు పోతాయ్. కానీ గాల్లో విమానం లో వుంటే పరిస్థితేంటి? సహజంగా కిందకి చూస్తూ కునుకు తీస్తాం. కానీ పక్కకి చూస్తే? దినకర్ వుంటే? కన్నీరు రంగు మారుద్ది. బ్లాగు గురించి చెప్పాలంటే ఏం చెప్తాం? తోట రాముడు అంతే.

షరతుల పెళ్ళికొడుకులు - I
“తాళి కట్టు శుభ వేళ మెడలో కళ్యాణ మాలా…” అని పాడుకోవాలంటే ముందు మెడలో ఓ బోర్డు పెట్టుకుని వెళ్ళాలి నేను పెళ్ళికి రెడీ అని. అలా పెళ్ళి కి రెడీ అని మెడలో బోర్డు పెట్టుకుని డోలు వాయించుకుంటూ ఎటు వంటి పెళ్ళాం కావాలో అని చెబుతున్న పెళ్ళి కాని ప్రసాద్ ల పై ఓ హాస్య సెటైరు. వధువు కావలెను అని ప్రకటన లిచ్చిన వారిపై అష్ట దిగ్గజాల్లో ఒకరైన తెనాలి రామలింగడి పేరుతో బ్లాగు లోకం లో అలరారుతున్న వికటకవి గారి నుండి వెలువడింది.

ఈ భూమ్మీద సుఖపురుషుడెవరోయ్ అని మా గురకేష్ ను ఎవరన్నా అడిగితే గురక పెట్టే వాడని ఠక్కునంటాడు. గురకేష్ పెద్ద గురక పిలాసఫర్. వాడికి ఎప్పటికైనా గురకల మీద పి.హెచ్డి చేసి డాట్రేటు కొట్టెయ్యాలని ఓ బలమైన కోరిక. వాడు ఎన్ని విన్నపాలు పంపించినా ఏ యూనివర్సిటీ వాళ్ళూ ఆ అంశం మీద పరిశోధన చెయ్యడానికి అనుమతి ఇవ్వలేదు. గురకేష్ ను అడిగితే ప్రతి యూనివర్సిటీ ప్రొఫెసరూ గురక పెడతాడు. నా పరిశోధనలో ఆ విషయం బయటపడకూడని తనని ముందుకు పోనీయటం లేదని ఆక్రోశిస్తాడు. ఏ అంశం మీద మాట్లాడమన్నా గురక గుళికలు మిళితం కాకుండా మాట్లాడడు.

ఉదాహరణకు మన వూరి వారి కోసం గ్రంథాలయం కట్టిద్దాం అన్నారంటే. అవును గ్రంథాలయాలు చదువుకోడానికి ఉపయోగపడతాయి, నిద్దరొస్తే బజ్జోడానికి ఉపయోగ పడతాయి. అప్పుడు బాగా గురక పెట్టొచ్చు. గురక శబ్దం రాకుండా వుండాలంటే రెండు వైపులా పెద్ద బైండు పుస్తకాలు పెట్టొచ్చు. నేను చిన్నప్పుడు మా స్కూల్లో లైబ్రరీలో ఇలానే బజ్జుండే వాడిని అంటాడు.

మొన్నామధ్య దశావతారం సినిమా చూసొచ్చాడు.సినిమా ఏలా వుందని అడిగితే పది గురకావతారాల్లో రెండు గురకావతారాలు అదిరిపోయాయన్నాడు. అంతే కాదు కమల్ హాసన్ పది అవతారాల్లో ఒక్కరికి కూడ గురక మీద అభిలాష వున్నట్టు లేదా గురక పెడుతున్నట్టు చూపించలేదని అర గంట వాపోయాడు.

వాడి పెళ్ళి చూపులప్పుడు అమ్మాయి నడిగిన మొదటి మరియు చివరి ప్రశ్న “మీరు గురక పెడతారా?” అని. ఆ అమ్మాయేమో “నేనే కాదు మా ఇంటిల్లి పాదీ పెడతాం. మా దెబ్బలకు ఊళ్ళో వాళ్ళు భయపడకుండా ఇల్లు సౌండు ప్రూఫు కూడా చేసుకున్నాం. మా ఇంటి పేరు పెను గుళికల కాదు పెను గురకల. అందరూ హేళన చేస్తారని మా నాన్నే అలా మారిపించేశారు” అంది. అంతే పైసా కట్నం లేకుండా పెళ్ళాడేశాడు మా గురకాభిమాని. అప్పట్నుండి వాళ్ళావిడ “రా వెన్నెల దొర..కన్నియను చేరా..కన్ను చేదరా..” అనే బదులు “రా గురకల దొర…గురకన్నియను చేరా…చెవులు అదరా..” అని పాట పాడితే గురకేష్ వెంటనే “గురక రాణివి నీవే.. గురక రాజు నేనే.. సౌండు కుదిరెను.. మైండు అదిరెను.. “ అని రిటర్న్ సాంగేసుకొని బ్రహ్మానందం, కోవై సరళ జంట లా ఓ బుజ్జి గురక యువరాజు ను కూడా కన్నారు. రెండో క్లాసులో గురక తరంగాలు వదులుతున్న వాణ్ణి స్కూల్లో సెల్ ఫోను మీద వ్యాసం రాయమంటే. “సెల్ వుంటుంది అది రింగవుతుంది. దాన్ని గురక అంటారు. ఇందులో చాలా గురకలు పెట్టుకోవచ్చు, కప్ప గురక, గుర్రం గురక, ఆంబోతు గురక అని పలు రకాలు వున్నాయి. కొన్ని ఆరోహణ క్రమంలోనూ కొన్ని అవరోహణ క్రమం లో పెట్టుకోవచ్చు వారి వారి అభిరుచిని బట్టి….” అని రాసి పెద్ద ప్రైజు కొట్టేశాడు. ఆ రోజు వాళ్ళింట్లో పీజ్జా పార్టీ చేసుకొని ఐమాక్స్ థియేటర్ కెళ్ళి తనివి తీరా గురకలు పెట్టి వచ్చారు. ఇప్పుడు ఆవు మీద వ్యాసం అని పోల్చే బదులు గురక మీద వ్యాసం అనే నానుడి ప్రచారం లోకి వచ్చేసింది.

వాడి థియరీ ప్రకారం సుఖంగా నిద్ర పోయే వాళ్ళ బుర్ర చురుగ్గా పని చేస్తుంది. బుర్ర చురుగ్గా పనిచేసే వాళ్ళే గొప్ప గొప్ప సైంటిస్టులు కూడా అయుంటారు. రాబర్ట్ బాయిలే, థియోడర్ ష్వాన్‌, ఆర్కిమెడిస్సు, ఆస్కార్ వైల్డు, హిట్లరూ, మన ఇంట్లో బట్లరూ గురకలు పెట్టే వాళ్ళే. అందుకే వాళ్ళు చాలా తెలివైనోళ్ళు అంటాడు. చరిత్రలో గురకలకు సముచిత ప్రాధాన్యాన్నివ్వలేదు. శ్రీ కృష్ణ పాండవీయం చిత్రం లో “మత్తు వదలరా నిద్దుర మత్తు వదలరా ఆ మత్తులోన బడితే గమ్మత్తుగా చిత్తవుదువురా…” అని పాట పెట్టారు గానీ అసలు పాట “గురక ఆపరా భీమ గురక ఆపరా.. ఆ గురకన బడితే సర్రున శతృవు శరమున చిత్తవుదువురా..” అని కొస రాజు రాస్తే టి.వి. రాజు గారు అడ్డు పడి మార్చేశారంటాడు. ఇక్కడ భీముడు గురక పెట్టాడు కాబట్టి సుఖపురుషుడంటే బలంగా వుండే మొద్దబ్బాయా అని ప్రశ్నిస్తే గురక స్వాములు వారిని అవమాన పరిచి నట్టే అని అంటాడు. సాధారణంగా లావుగా బొద్దుగా వుండే వాళ్ళు పెద్ద పెద్ద గురకలు పెడుతుంటారనుకొంటారు కానీ అది నిజం కాదు అని నిరూపిస్తానంటాడు.

వీడి థీసిస్ లో రాసుకున్న ప్రకారం నవ గురక గుళికలు వున్నాయిట.

1. పిల్ల గురకలు: పిల్లలు పెట్టే గురకలు కాదు. గురకల్లో పిల్లవి. హిస్…హిస్…..హిస్…. అని సాగుతూ నాద స్వరానికి పీక పీకేసి ఊదినట్టు వుంటుంది. వీటితో పెద్ద ఇబ్బంది వుండదు. ఎక్కడ పడుకున్నా పక్క నున్న వాళ్ళకు ఇబ్బంది వుండదు. కాకపోతే వీళ్ళకు పాములంటే భయముండకూడదు.

2. సెట్విన్ గురకలు : హైదరాబాదు వాళ్ళు మాత్రమే గుర్తు పట్టే గురకలు ఇవి. ఇవి ఎక్కడినుండి వస్తాయో ఎలా వస్తాయో తెలీదు. సౌండు వున్నట్టుండి “గుడు..గుడు..గుడు..గుడు” అని మొదలవుతుంది. కొన్ని క్షణాల్లోనే మాయమయి పోతుంది. సస్పెన్స్ సినిమాలు తీసే వాళ్ళకు ఇలాంటి గురకలే ఇన్స్పిరేషన్ అని వీడు గురక గుద్ది మరీ చెబుతాడు. ఇవే వున్నట్టుండి నిశ్శబ్దాన్ని చేదించి కళ్ళు మూసి తెరిచే లోగా మాయమయిపోతాయిట.

3. టౌన్ బస్సు గురకలు: విజయవాడ టవున్ బస్సు వాళ్ళు మేము అందరికన్నా ముందు వెళ్తున్నాం అని చెప్పడానికి ఎప్పుడూ ఇంజెన్ ఆన్ చేసి పెట్టుకొంటారు. ఆ బస్సు ఇంజెన్ లాగే ఈ గురకలు ఒక పట్టాన ఆగవు. వున్నట్టుండి “డగ..డగ..డగ..డగ….” అని మంద్ర స్థాయిలోకి వెళ్ళి పోయి ఒక్కసారిగా బంజీ జంపింగ్ లా “సూ….సుయ్….” అని కింద పడతాయి. వీళ్ళతో సెట్విన్ గురకల వాళ్ళు తప్ప వేరెవ్వరూ పడుకోలేరు.

4. గుర్రం గురకలు : ఇవి గుర్రం సకిళించినట్టు వుంటాయి. మోస్టు కన్సిస్టంట్ గురకలు. హెచ్చు తగ్గులు అసలే వుండవు. ఓ సారి నడుం వాల్చారంటే సకిళింపులు తప్ప వేరేవి బయటికి వినపడవు. దీన్ని ఆధారం చేసుకొని తెలుగు సినిమా పాటలు ఎన్నో రాశారు.

5. బావి గురకలు: కప్పీ (గిలక) కి చేంతాడు వేసి బకెట్ తో నీళ్ళు తోడుకున్నట్టు వుంటాయి. ఖాళీ బకెట్ కిందకు వెళ్ళేప్పుడు శబ్దం చేసినట్టు బర..బరా కిందకు వెళుంతుంది. బకెట్ నీళ్ళు తోడుకునేటప్పుడు మాత్రం కాస్త విరామం వస్తుంది. అది కూడా బుడుంగ్ బుడుంగ్ మని. కాసేపటికి నీళ్ళ బకెట్ పైకి వస్తున్నట్టు రొప్పుతూ…కికీ..కి..కికీ కి, కీకీకీ…కికికి… అని లయబద్దంగా సాగుతుంది కందెన లేని కప్పీ లా.

6. రిగ్గు గురకలు: నీళ్ళ కోసం బోరింగు రిగ్గులేస్తున్నట్టు వుంటాయి. పాత ట్రాక్టర్ల పొగ గొట్టానికి పెట్టిన మూత ఎగురుతున్నట్టు పై పెదవి ఎగురుతూ దడ..దడ..దడ దడఖ్. దడ దడ దడ దడఖ్..అని కాసేపటికే మేక తుమ్మినట్టు తుసుస్..తుస్. తుసుస్..తుస్.. అని సౌండొస్తుంది. వీళ్ళ పక్కన పడుకోవాలంటే గుండె ధైర్యంతో పాటు జీవితం మీద విరక్తి కలిగి వుండాలి.

7.రాక్షస గురకలు : హీ.. హి..హి. హీ. హి..హి, కిలి కిలి కిలి అని పోలేరమ్మ జాతర్లో పూనకం వచ్చినట్లు వుంటుంది. వీళ్ళని ఎవ్వరూ పెళ్ళిళ్ళకు పిలవరు. పిలిస్తే కళ్యాణ మంటపమంతా నిద్ర లేకుండా చేస్తారు. పెళ్ళి కూతురు పారిపోయే ప్రమాదం కూడా వుంటుంది.

8.కప్ప గురకలు: పేరుకు తగ్గట్టే బెక..బెక..బెక. అని గ్యాప్ ఇచ్చి బెక..బెక..బెక అని మొదలవుతాయి. చిన్న పిల్లల్ని ఆడించాలంటే ఇలాంటి గురకలు పెట్టే వాళ్ళ దగ్గరికి తీసుకెళ్ళాలి. ఏడ్చే పిల్లాడు కిత కితలు పెట్టినట్టు నవ్వు తాడు.

9.ఆంబోతు గురకలు: మెజారిటీ గురకిస్టులు పెట్టే గురకలు ఇవే. వీటి శబ్దాలు ఆ రోజు తిన్న భోజనం పై ఆధార పడి వుంటాయి. వీళ్ళు సహజంగా ఉప్మా ప్రియులు, రేలంగి అభిమానులు అయుంటారు. బాగా తిన్న వాళ్ళు రంకెలు వేస్తున్న ఆంబోతులా తక్కువ తిన్న వారు రాగాలు తీస్తున్న ఆంబోతులా శబ్దాలు చేస్తారు.

గురకేష్ పెళ్ళయిన కొత్తలో ఒ సారి బంధువుల ఇంటి కెళితే ఆ రాత్రి అదను చూసుకొని ఓ దొంగ ఇంట్లో పడ్డాడు. వాడు గోడకు కన్నమేసి ఇంట్లోకి చడీ చప్పుడు కాకుండా వెళ్ళి ఇనప్పెట్టె తలుపులు తెరియగానే వీడు పోఖ్రాన్ అణు పరీక్షలు జరిపినట్టు అప్పుడే బాంబు పేలుడు గురకలు పెట్టడం విని ఆ దొంగ దయ్యం వచ్చిందని భయపడి గావు కేక పెట్ట పడిపోయాడు. గురకల వల్ల ఉపయోగాలేంట్రా అంటే వాడు చెప్పే మొదటి కథ గురక, గురకేష్, ఓ దొంగోడూ ఇదే.

ఎటువంటి కళాకారుడి కైనా ఎవరో ఒక ఐడాల్ వుంటారు కదా అలాగే గురక కళాభిమాని ఐన గురకేష్ కు ఆదర్శం వాళ్ళ తాత. ఎవరికెన్ని బిరుదులిచ్చినా గురక బ్రహ్మ అనే బిరుదు మాత్రం వాళ్ళ తాత పేరు మీదే వుందట. వీడి “గురక, గురకేష్ ఓ దొంగోడు” తరువాత వచ్చే సీరియల్ కథ గురక సింహా రెడ్డి మహత్యం. ఓ సారి వాళ్ళ తాత ఏదో కొత్తగా గుడి కడుతున్న చోట చెట్టు కింద నిద్ర పోయాడట. ఆయన పెట్టిన శతృ భయంకర, ప్రళయ, ఘీంకార గురకలకు పైకెత్తిన స్థంభాలు కూడ నేల మీద పడ్డాయిట. అదే రెసొనన్స్, హార్మానిక్ మోషన్ అన్న పదాలకి బాటలు వేసిందట. అప్పట్నుండి వాళ్ళ తాతను ఏ భవనాన్ని కూలగొట్టాలన్నా పిలిచి రెండు బస్తాల జీడిపప్పు ఉప్మా చేసి నిద్ర పుచ్చేవారట.ఈ విషయం చరిత్ర కెక్కుంటే శాస్త్ర వేత్త రుడాల్ఫ్ హెర్ట్గ్ బదులు వాళ్ళ తాత గారి పేరు వుండేదట.

వాడికి బాగా డబ్బొస్తే గురక వీరుల దినం అని ప్రకటించి బాగా గురక పెట్టే వాళ్ళకు గురక వీర, గురక సామ్రాట్, గురక భూషణ్ అని బిరుదులిచ్చి జన్మకో సార్థకత చేకూర్చుకుంటాట్ట. గురకలు తీసే ప్రతి ఒక్కరిని గురక రత్న అనే పేరు తో ముద్దుగా పిలిచుకోవాల్టిట.

.

నవ్వడం ఒక భోగం
నవ్వించడం ఒక యోగం
నవ్వలేక పోవడం ఒక రోగం.

బ్లాగుల్లోని మేలిమి హాస్యాన్ని మీకు అందించడానికి బ్లాస్యం.కామ్‌ వెలిసింది.మీకు నచ్చితే మా ప్రయత్నాన్ని ప్రోత్సహించండి.

- బ్లాస్యం